Семей.26.09. “Semeyainasy” – Аймақ басшысы Даниал Ахметовтің нұсқауымен облыстағы әлеуметтік маңызы бар нысандарға күннің күрт суытуына байланысты жылу беріле бастады. Ал көпқабатты тұрғын үйлер кестеге сәйкес жүргізіліп жатқан қажетті дайындық жұмыстары аяқталғаннан кейін, яғни қазанның алғашқы күндерінде-ақ жылу жүйесімен қамтылатын болады. Бұл туралы қала әкімдігінде ШҚО табиғи монополияларды реттеу және бәсекелестікті қорғау комитеті Департаментінің басшысы Қайрат Оразбаев пен қала әкімінің орынбасары Николай Ушаковтың қатысуымен өткен баспасөз мәслихатында мәлім болды.

– Бүгін, яғни 26 қыркүйек күні Семей қаласының әкімі Ермак Сәлімов жылу беру маусымының басталғаны туралы қаулы шығарды. Әуелі жылуға қаладағы ауруханалар, балалар бақшасы, білім беру мекемелері сынды барлық әлеуметтік нысандар қосылады. Көпқабатты тұрғын үйлерге келер болсақ, жылу дайындық паспорты бар баспаналарға берілмек. Бүгінде «Жылукоммунэнерго» МКМ жылумен қамтып отырған 1069 көппәтерлі үйдің 900-нде дайындық паспорты бар. Қалған үйлер жылу маусымына дайындық шараларын тамамадап қалды,-деп атап өтті қала әкімінің орынбасары Николай Ушаков.

Айта кетейік, жылу беру компанияларын жөндеуден өткізу мақсатында облыстық қазынадан 162 млн.теңге көлемінде қаржы бөлінген. Бүгінгі күні «Ғаббасов», «35 квартал», «Зооветинститут» қазандықтары жаңартылды. Қажетті көмір де қалаға жеткізілуде. Бүгінде 50 мың тонна көмір түсірілді.

Айзада Сламбаева

 621 всего,  3