Семей.18.03.”Semeyainasy”- Ежелден жаңарту мен жасампаздықтың бастауы, ырыс пен берекенің арқауы болған Әз – Наурыз мерекесі қарсаңында Семей қалалық полиция басқармасының қызметкерлері арасында спорттық ойындардан жарыс өткізілді. Жарысқа Орталық, Затон, Әуезов полиция бөлімдерінен және патрулдік полиция баталонынан 4 команда қатысты.
Шырайлы көктемнің шуақты күндерінде келетін төл мерекемізге орай ұйымдастырылған спорттық іс-шараны Семей қ.ПБ бастығының орынбасары полиция подполковнигі Ш.Х. Қанағатов ашып, жарысқа қатысушыларды Ұлыстың Ұлы күні – Наурыз мерекесімен құттықтап, жылы лебізін білдірді.
Наурыз мерекесіне орай өткізілген спорттық ойындарға команда мүшелері белсене қатысты. Қатысушылар гір көтеру, арқан тарту және отбасылық эстафета сынды спорт түрлері бойынша жүлде алуға өз өнерлерін ортаға салды.
16 келі тартатын гірді 120 рет басынан асыра көтерген Әуезов ПБ қызметкері Криминалдық полиция бөлімшесінің жедел уәкілі полиция капитаны Ринат Тыныбаев жеңімпаз атанды.
Бабадан балаға мұра іспеттес болып келе жатқан арқан тарту ойыны қатысушылардың күш-қуатын дамытуға, өзара бірлікте еңбектенуге үйретеді. Білектің күші сынға түсетін сайыста Әуезов полиция бөлімінің ұжымы қарсылас шақ келтірмей, бірінші орынға жайғасты.
Ал бірнеше кезеңнен тұратын эстафеталық жарысқа полиция қызметкерлері өз отбасыларымен қатысты. Командалар «Кедергілер арасымен жүгіру», «Доппен жүгіру», «Қаппен секіру» бойынша күш сынасты. Көптің арасынан көзге түскен Орталық ПБ Тергеу бөлімшесінің аға тергеушісі полиция майоры Р. Ешимованың отбасылық командасы жарысқа ерекше дайындықпен келгені көрініп тұрды. «Салауатты өмір салтын ұстану отбасымыздың мақсаты. Қызымыз гимнастикаға қатысады. Дені сау ұрпақ тәрбиелейтін осындай спорттық жарыстар полиция басқармасы тарапынан жиі ұйымдастырылып тұрады және отбасымызбен үнемі қатысамыз» – деп ол өз ойымен бөлісті.
Жалпы командалық жарыста бірінші орынды патрулдік полиция баталонының командасы иеленсе, екінші орынға Орталық ПБ командасы табан тіреді. Үшінші орынды Затон ПБ командасы алды.
Аса қызықты өткен халықтық мерекеде спорттық ойындардың көрігін қыздырған жарыс жеңімпаздары «Динамо» ДСҚ грамоталарымен және бағалы сыйлықтарымен марапатталды.
Семей қ. ПБ баспасөз қызметі
581 всего, 3